10 траўня 2018 у Нацыянальным гістарычным архіве Беларусі адбылася прэзентацыя V тома гісторыка-генеалагічнага выдання “Гербоўнік беларускай шляхты”, прысвечанага радаводам шляхецкіх фамілій, чые прозвішчы пачынаюцца на літару “Д”.

Праца падрыхтавана аўтарскім калектывам з ліку супрацоўнікаў аддзела публікацыі дакументаў НГАБ (на чале з Яўгенам Станіслававічам Глінскім, галоўным аўтарам і ўкладальнікам тома). Таксама аўтарамі кнігі з’яўляюцца Д.Ч. Матвейчык, Ю.М. Снапкоўскі, В.В. Урублеўскі.

За некалькі год працы было складзена 213 артыкулаў у дачыненні да шляхецкіх родаў, што пражывалі, прызнаваліся ў шляхецтве і зацвярджаліся або незацвярджаліся ў дваранстве па Мінскай губерніі Расійскай імперыі. Акрамя артыкулаў, структураваных у звычайным выглядзе, і выяў гербаў, адшуканых у родавых справах, вялікае месца ў кнізе займаюць каментары да артыкулаў, звязаныя з вялікай колькасцю фальсіфікаваных і сумнеўных дакументаў, што падаваліся шляхтай на разгляд дваранскага дэпутацкага сходу.

Свае віншаванні з нагоды выдання тома агучылі дырэктар НГАБ Дзмітрый Уладзіміравіч Яцэвіч, намеснік дырэктара НГАБ Дзяніс Васільевіч Лісейчыкаў, прадстаўнік Дэпартамента па архівах і справаводству Рыгор Сцяпанавіч Жаўняркевіч, рэцэнзенты з Інстытута гісторыі і гістфака БДУ Валянцін Фёдаравіч Голубеў і Віталь Сяргеевіч Макарэвіч, адзін з аўтараў і папулярызатар генеалагічных ведаў Вадзім Валер’евіч Урублеўскі, прадстаўніца выдавецтва “Беларусь” Анжэла Аляксандраўна Садоўская і галоўны герой мерапрыемства Яўген Станіслававіч Глінскі.

Дадзены том “Гербоўніка” выйшаў у свет у колькасці 300 экзэмпляраў, з якіх на цяперашні час прададзена больш за палову асобнікаў. У выдавецтве “Беларусь” кнігу магчыма набыць па сабекошце (80 руб.), у іншых месцах з нацэнкай (больш за 100 руб.).

Выходныя дадзеныя: Гербоўнік беларускай шляхты. Т. 5. Д / Я.С. Глінскі [і інш.]; навук. рэд. А. Рахуба. – Мінск : Беларусь, 2018. – 847 с.

10 траўня 2018