Вітальнае слова

Дадзены генеалагічны партал створаны па ініцыятыве грамадскага аб’яднання – гурток даследчыкаў генеалогіі “Радавод” пры гістфаку БДУ – у асветніцкіх і навуковых мэтах, а менавіта накіраваны на паляпшэнне метадычных навыкаў у пошуках сваіх каранёў, павышэнне генеалагічнай культуры і гістарычнай свядомасці аўдыторыі.

Агульная інфармацыя пра гурток

Адраджэнне нацыянальнай самасвядомасці немагчыма без усведамлення народам самога сябе як непарыўнай часткі сваёй краіны, яе гісторыі, мовы і культуры. Пры гэтым важна не толькі духоўная, але і кроўная повязь з Радзімай, дзесяткамі пакаленняў продкаў, што жылі на ёй да нас. Продкі – не маўклівая і аморфная маса без імёнаў і лікаў, а жывыя людзі мінулага, чые фізічныя рысы і рысы характару перададзены нам па спадчыне. Памяць аб іх патрэбна нам, як даніна павагі былым часам і надзея на лепшую будучыню.

Абуджэнне цікавасці да генеалогіі ў Беларусі асабліва адчуваецца ў апошняе двадцацігоддзе. На хвалі агульнага інтарэсу да генеалогіі ўзнік і распачаў сваю дзейнасці гурток даследчыкаў генеалогіі “Радавод”, што дзейнічае на гістарычным факультэце БДУ з вясны 2009 г. На дадзены момант праведзена 24 пасяджэння: у 2009 г. – чатыры, у 2010 г. – пяць, у 2011 г. – шэсць, у 2012 – шэсць, у 2013 – шэсць.

На пасяджэннях гуртка “Радавод” ужо паспелі прыняць удзел многія слынныя беларускія даследчыкі генеалогіі, у тым ліку Ц.В. Акудовіч, У. Вяроўкін-Шалюта, С.У. Грунтоў, Д.М. Дрозд, В.К. Крэсс, А.М. Латушкін, М.Д. Макараў, В.М. Папко, С.Я. Рассадзін, С.А. Рыбчонак, В.У. Ханецкі, Ф.В. Чарняўскі, В.А. Юрша; маладыя даследчыкі А.Л. Бацяноўскі, М.В. Гацак, В.Г. Караффа-Корбут, С.А. Міскевіч, Ю.М. Снапкоўскі, В.В. Урублеўскі; студэнты С.П. Крывіцкая, А.С. Кулікоўскі.

Увесну 2011 г. адбылося зацвярджэння Статута ГДГ “Радавод” на гістфаку БДУ і яго эмблемы ў выглядзе радаводнага дрэва Беларусі.

29 чэрвеня 2011 г. падведзены вынікі першага конкурса генеалагічных прац старшакласнікаў агульнаадукацыйных школ, студэнтаў і выпускнікоў ВНУ. Першае месца прысуджана Гацаку Максіму Віктаравічу, выпускніку факультэта міжнародных бізнэс-камунікацый Беларускага дзяржаўнага эканамічнага універсітэта (2010). Другое месца – Крывіцкай Святлане Пятроўне, выпускніцы гістфака БДУ (2011). Трэццяе месца – Марозавай Ірыне Ўладзіміраўне, вучаніцы 10 класа Палатоўскай сярэдняй школы Полацкага р-на Віцебскай вобласці.

ГДГ “Радавод” сумесна з “Этнай”, “Ікамосам” і “Камяніцай” выступіў арганізатарам прыборак і апісання старажытнай часткі могілак у мястэчку Гальшаны Ашмянскага раёна Гродзенскай вобласці (колішняга Ашмянскага павета Віленскага ваяводства). Летнік адбываўся з 1 па 15 жніўня 2011 г. Усяго ўдзел у ім прыняла каля 30 чалавек, пераважна з ліку студэнцкай моладзі. Апісана каля 250 пахаванняў, большая частка якіх датуецца ХІХ ст. У жніўні 2012 г. вялася праца з метрычнымі кнігамі Гальшанскіх касцёла і царквы, якія зберагаюцца ў Нацыянальным гістарычным архіве Беларусі ў г. Гродна, па ідэнтыфікацыі пахаваных там асоб.

На працягу 2013 г. прыняты ўдзел у прэзентацыі кніжнай серыі А.В. Чабаганава “Я – сын Ваш” у межах культурна-асветніцкай акцыі міжнароднага дабрачыннага фонда “Сям’я. Яднанне. Айчына” (Мінск, БелЭкспа, 7 лютага). У межах Міжнароднага фестываля саверсізму і ігдрасілізму Дах-Крах-ХХ адбыліся выступленні прадстаўнікоў гуртка перад наведнікамі музея (Мінск, Музей сучаснага выяўленчага мастацтва, 3 мая), 12 ліпеня і 26 ліпеня – перад валанцёрамі летніка ў Сёмкавым Гарадку Мінскага р-на, 26 лістапада – перад наведнікамі бібліятэкі № 10 імя Міхаіла Мінкевіча (г. Мінск). 23 мая адбылася прэзентацыя сайта “Некропалі Беларусі” (www.niekropali.by). Па ініцыятыве намесніка старшыні гуртка В.В. Урублеўскага ў верасні была заснавана першая ў Беларусі “Школа практычнай генеалогіі”, якая дзейнічае пры прыходзе свяціцеля Мікалая Японскага ў г. Мінск (м-н Каменная Горка, вул. Лідская, 12).

17 лютага 2014 г. адбылося выступленне Ю.С. Адамовіча на курсах “Мова нанова” у галерэі “Ў” з прэзентацыяй дзейнасці гуртка “Радавод”. 26 лютага В.В. Урублеўскі выступіў з дакладам “Духоўныя падставы да даследавання радаводу: вопыт Школы практычнай генеалогіі ў г. Мінску” у межах Моладзевага катэхізічнага форума, арганізаванага ў Санкт-Пецярбургу. 2 сакавіка ён жа прыняў удзел у першай рэгіянальнай канферэнцыі ў вобласці ІТ-тэхналогій у Салігорску з тэмай “Адраджэнне Памяці аб продках пачынаецца з дзеянняў нашчадкаў”. 4 сакавіка інтэрв’ю пад назвай “Менскаму гуртку Радавод спаўняецца 5 гадоў” даў куратару курсаў “Мова нанова” Глебу Лабадзенку сябар гуртка Ю. Адамовіч.

Мэта, задачы, прадмет, асноўныя накірункі і механізмы дзейнасці гуртка, правы і абавязкі сябраў і кіраўніцтва, арганізацыйная структура, маёмасць і парадак спынення дзейнасці акрэслены ў Статуце “ГДГ Радавод”. Асобным дакументам з’яўляецца праграма дзейнасці гуртка, распрацаваная на падставе асноўных накірункаў дзейнасці. Спасылка на статут і накірункі дзейнасці гуртка: http://hist.bsu.by/kafedry/kafedra-istochnikovedeniya/nauchnye-kruzhki.html

Старшыня ГДГ “Радавод” – кандыдат гістарычных навук, дацэнт кафедры крыніцазнаўства гістфака БДУ Андрэй Мікалаевіч Латушкін. Намеснік старшыні і сакратар – галоўны архівіст аддзела публікацыі дакументаў НГАБ Вадзім Валер’евіч Урублеўскі. Навуковы кансультант – кандыдат гістарычных навук, супрацоўнік Інстытута гісторыі Акадэміі Навук, старшы выкладчык кафедры крыніцазнаўства гістфака БДУ, буйнешы спецыяліст па генеалогіі Беларусі – Сяргей Аляксандравіч Рыбчонак.

Дадаць каментар

Ваш e-mail не будзе апублікаваны. Абавязковыя палі пазначаны *


4 − = 2

Можна выкарыстоўваць наступныя HTML-тэгі і атрыбуты: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>