Вітальнае слова

Дадзены генеалагічны партал створаны па ініцыятыве грамадскага аб’яднання – гурток даследчыкаў генеалогіі “Радавод” пры гістфаку БДУ – у асветніцкіх і навуковых мэтах, а менавіта накіраваны на паляпшэнне метадычных навыкаў у пошуках сваіх каранёў, павышэнне генеалагічнай культуры і гістарычнай свядомасці аўдыторыі.

Агульная інфармацыя пра гурток

Чытаць далей



Сустрэча роду Булатаў адбылася ў Капылі і Капыльскім р-не

На хвалі зацікаўлення да каранёў у Беларусі, асабліва ў апошняе дзесяцігоддзе, пачалі практыкавацца сустрэчы прадстаўнікоў канкрэтнага беларускага роду, пераважна са шляхецкім мінулым. Пры гэтым у сустрэчах прымаюць удзел як жыхары Беларусі, так і прадстаўнікі блізкага і далёкага замежжы. Часты характар набылі сустрэчы Матусевічаў, нашчадкаў шляхецкага роду з ваколіцы Леановічы Ігуменскага павета Мінскай губерні (цяпер Пухавіцкі р-н Мінскай вобл.). На сённяшні момант адбылося чатыры Міжнародных сустрэчы прадстаўнікоў роду (2003, 2004, 2006, 2016): http://matusewicz.org/old/ps.htm

Падобную ініцыятыву выказалі і ажыццявілі 1 ліпеня 2017 года ў дачыненні да свайго роду і прадстаўнікі прозвішча Булат, якія вядуцца ад супольнага продка Пятра Булата, што жыў у XVI ст. Месцам правядзення сталі Капыль і Капыльскі раён. У праграме сустрэчы планавалася наведванне магіл продкаў, размова і знаёмства з родзічамі (у Цімкавіцкім доме культуры), закладка памятнага камяня на месцы былой вёскі Булатнікі. На сустрэчы прысутнічала каля 70-ці чалавек рознага ўзросту, роду заняткаў і з розных месцаў пражывання. Але мэта была адной – яднанне з блізкімі па крыві. І яна была дасягнута! Сустрэча адбылася і стала значнай падзеяй у гісторыі гэтага старажытнага шляхецкага роду.

11.07.2017

Сустрэча Булатаў (01.07.2017) Вёска Булатнікі CozeY--HM7c



ШКОЛА ПРАКТЫЧНАЙ ГЕНЕАЛОГІІ (V сезон, абвестка)

У верасні 2017 г. працягне сваю дзейнасць Школа практычнай генеалогии (ШПГ) пры прыходзе ў памяць свяціцеля Мікалая, епіскапа і асветніка Японіі, створаная ў мэтах асветы ўсіх жадаючых. Асноўнае кола пытанняў, якім надаецца ўвага, зводзіцца да наступных тэм: практычны пошук інфармацыі аб продках, выхаванне дзяцей на падмурку сямейна-родавых каштоўнасцяў, духоўнае самапазнанне.

Заняткі будуць уключаць у сябе не толькі навуковую тэорыю, але і асабісты вопыт у складанні і асэнсаванні свайго радавода, папулярызацыю гістарычнай дакументальнай спадчыны і набыткаў айчыннай гістарыяграфіі, знаёмства з вядомымі спецыялістамі ў дадзенай сферы. Запланавана правядзенне экскурсій і асветніцкіх сустрэч.

Дадзеная вучэбная ініцыятыва прадугледжана для дарослых людзей, якія могуць прымяніць адшуканую інфармацыю ў мэтах належнага выхавання падрастаючага пакалення.

Тэрміны правядзення заняткаў – суботнія дні, два разы на месяц (16 заняткаў, з 9 верасня 2017 г. па 28 красавіка 2018 г.).

Час правядзення – 11.30-13.30 (першае паўгоддзе).

Мовы правядзення заняткаў – беларуская, руская (па жаданні слухачоў).

Заяўкі на ўдзел прымаюцца да 1 верасня 2017 г. У выпадку спазнення крайняя дата – 7 кастрычніка 2017 г.

Кіраўнік – Урублеўскі Вадзім Валер’евіч, кандыдат гістарычных навук, супрацоўнік Нацыянальнага гістарычнага архіва Беларусі (г. Мінск), намеснік старшыні генеалагічнага аб’яднання “Радавод” гістарычнага факультэта БДУ.

Усім жадаючым праслухаць курс рэкамендуецца ў заяве на імя протаіерэя Паўла (Сярдзюка), настаяцеля прыхода ў памяць свяціцеля Мікалая Японскага, пазначыць наступныя звесткі аб сабе:

1)    Прозвішча, Імя, Імя па бацьку.

2)    Дата і месца нараджэння.

3)    Род заняткаў.

4)    Месца жыхарства, кантактныя тэлефоны, адрас электроннай пошты.

5)    Генеалагічныя звесткі аб бацьках, бабулях і дзядулях (прозвішчы, імёны, імёны па бацьку, даты жыцця, месцы нараджэння і жыхарства, веравызнанне, саслоўнае паходжанне, сямейна-роднасныя сувязі). Дадзеная інфармацыя неабходна з мэтай аказання кампетэнтнай дапамогі ў правядзенні самастойных гістарычных і генеалагічных даследаванняў.

Заявы ў рукапісным або пячатным варыянце прадстаўляць асабіста ў рукі альбо на электронную пошту выкладчыку Вадзіму Валер’евічу Урублеўскаму (slepovron@mail.ru).

Прыкладныя найменні тэм і даты правядзення заняткаў для паступаючых на першы год навучання (першае паўгоддзе):

  1. Духоўныя і душэўныя карані генеалагічнага пошуку (9 верасня 2017).
  2. Першыя крокі генеалагічнага пошука: вусная інфармацыя, сямейны архіў, надпісы надмагільных помнікаў, інтэрнэт-рэсурсы (23 верасня 2017).
  3. Паходжанне і фарміраванне прозвішчаў жыхароў Беларусі, тэрміны сямейна-роднасных сувязяў, некаторыя аспекты з гісторыі традыцыйнай сям’і ў Беларусі (7 кастрычніка 2017).
  4. Асаблівасці функцыянавання дзяржаўных архіваў (21 кастрычніка 2017).
  5. Асаблівасці самастойнай працы ў дзяржаўных архівах (4 лістапада 2017).
  6. Генеалагічная работа з форумамі гісторыка-генеалагічных і гісторыка-геральдычных сайтаў, сацыяльнымі сеткамі інтэрнэта (18 лістапада 2017)
  7. Правілы і прыёмы ў афармленні генеалагічнай інфармацыі (асаблівасці складання генеалагічных схем і роспісаў, працы генеалагічных праграм) (2 снежня 2017).
  8. Бібліяграфія генеалогіі Беларусі: рэклама найбольш цікавых кніжных выданняў (16 снежня 2017).

12.07.2017                                                                              Урублеўскі В.В.

OLYMPUS DIGITAL CAMERA



Дакументы аб выкупе зямлі арандатарамі як малавядомая крыніца па гісторыі сям’і

Ва ўмовах незахаванасці метрычных кніг, як крыніц прамой генеалагічнай інфармацыі, за канец ХІХ – пачатак ХХ стагоддзяў, асаблівую каштоўнасць набываюць іншыя гістарычныя дакументы, якія могуць змяшчаць звесткі з гісторыі сям’і і генеалагічную інфармацыю.

Звернемся да наступных заканадаўчых актаў:

1893, 19 студзеня – выданне “Пастановы аб пазямельным уладкаванні “рускіх” арандатараў праваслаўнага веравызнання”. Адпаведна яе праваслаўныя арандатары, якія на дамоўных умовах валодалі зямлёй у адным месцы больш за 40 год, маглі набываць зямлю ў прыватную ўласнасць.

1903, 17 сакавіка – закон аб праве выкупаць зямельныя надзелы тым асобам, у тым ліку каталікам, якія арандавалі зямлю на адным месцы да паўстання 1863 (маглі паходзіць з вольных станаў, у тым ліку з адпушчаных на волю да 20.11.1857 прыгонных сялян).

З’ява знайшла адбітак у матэрыялах губернскіх па сялянскіх справах прысутнасцяў, фонды якіх захоўваюцца ў гістарычных архівах Беларусі ў Мінску і Гародні. У прыватнасці, справы аб выкупе зямлі могуць уключаць вельмі разнастайную дакументацыю:

1)    Прашэнні аб дазволе выкупаць зямлю ў памешчыка;

2)    Скаргі на рашэнні неадменнага члена павятовага з’езда і павятовай па сялянскіх справах прысутнасці аб адмаўленні ў праве выкупа.

3)    Пастановы аб дазволе права выкупа зямлі з уласнасці памешчыка;

4)    Выкупны акт з пазначэннем колькасці дзесяцін выкупаемага надзелу і месцам яго размяшчэння.

5)    Папярэднія арэндныя дамовы арандатара з землеўласнікам з рэгламентаванымі ўмовамі арэнды.

6)    Выпіскі з метрычных кніг, рэвізскіх сказак, спавядальных ведамасцяў і пасямейных спісаў, якія сведчаць аб непрыгонным стане прашэнцаў да часу адмены прыгоннага права.

24.06.2017

04 05 06а 06б 06в 06г



Памёр Віктар Крэсс

***

15 чэрвеня нечакана памёр наш дарагі сябар-паплечнік, адзін з актыўных папулярызатараў гісторыі і генеалогіі Беларусі Віктар Канстанцінавіч Крэсс. Спадар Віктар чула ставіўся да ўсіх ініцыятыў у сферы беларускай гісторыі і генеалогіі. Шмат год запар ён плённа збіраў, сістэматызоўваў і афармляў інфармацыю пра сваіх продкаў са шляхецкіх радоў Панятоўскіх і Скіндзераў. Ён адзіны з ліку выступоўцаў ГДГ Радавод і Школы Практычнай генеалогіі, хто акрамя падрыхтоўкіВіктар Крэсс (16.05.2015) стракатага ілюстратыўнага матэрыяла, таксама збіраў на свае выступы сваіх шматлікіх родных і сваякоў. Уваскрасаючы імёны і ўчынкі продкаў ён не забываў перадаваць памяць пра гісторыю і культуру сваім нашчадкам (яго сын Зміцер вядомы як беларускамоўны паэт).

Мяркую, надышоў час лічыць што той,  хто адраджае Памяць аб мінулым – герой.

Вечная Памяць героям!

Вадзім Урублеўскі

18.06.2017



Пасяджэнне ГДГ Радавод на тэму “Радаводы беларускіх літаратараў”

19 мая 2017 г. на гістарычным факультэце БДУ адбылося чарговае пасяджэнне ГДГ “Радавод”. Гасцямі аб’яднання выступілі выкладчыкі гістарычнага факультэта БДУ кандыдаты гістарычных навук Ігар Міхайлавіч Аўласенка (на фота злева) і Віктар Адамавіч Кахновіч (на фота справа).

Выступ Ігара Аўласенка, які і вызначыў тэму сустрэчы, прысвячаўся асвятленню асобных генеалогій беларускіх пісьменнікаў, якімі сталі радаводы Паўла Іванавіча Пруднікава (1911-2000), сына сялян з вёскі Стары Дзедзін Клімавіцкага павета Магілёўскай губерні, дзеда па маці выступоўцы, і Аркадзя Аляксандравіча Куляшова (1914-1978), сына настаўнікаў і жыхароў мястэчка Саматэвічы Чэрыкаўскага павета той жа губерні. Быў праведзены этымалагічны разбор прозвішчаў, згаданы вопыт працы з рэвізскімі сказкамі рэгіёна, акрэслена дваюрадная ступень роднасці пісьменніка Паўла Іванавіча Пруднікава  і паэта Алеся Трахімавіча Пруднікава (1910-1941), адзначаны украінскія і італьянскія карані бацькі Куляшова, шляхецкае паходжанне жонкі пісьменніка Аксаны Шчарбовіч-Вечар, факт яго сваяцтва праз жонку з празаікам Платонам Галавачом (1903-1937) (Аксана даводзілася сястрой яго жонцы Ніне). Значную частку выступлення склаў аповяд пра біяграфію Паўла Іванавіча Пруднікава. Выступленне суправаджалася паказам прэзентацыі.

Няменш цікавым было выступленне Віктара Адамавіча Кахновіча, прысвечанае галоўнай адзінцы генеалагічнага пошуку Нацыянальнага архіўнага фонда – метрычнай кнізе. Аўтар на прыкладзе метрык Плотніцкай Пакроўскай царквы Пінскага павета, да прыходу якой адносіліся яго продкі – жыхары вёсак Бобрык і Церабень – адзначыў асноўныя праблемныя моманты працы са згаданай крыніцай, звязаныя з памылкамі і недакладнасцямі ў падачы звестак пра пол, узрост, веравызнанне, прозвішча і імя народжанага. Як і ў папярэднім выпадку, значная ўвага была нададзена біяграфіі дзеда выступоўцы – Аляксандра Мацвеевіча Кахновіча (1913–1973), пратэстанта-баптыста з вёскі Бобрык.

Наступнае пасяджэнне прызначана на восеньскі перыяд.

19.05.2017106_2613



19 мая 2017 на пасяджэнні ГДГ Радавод плануюцца выступленні выкладчыкаў факультэта — гісторыкаў Ігара Аўласенкі і Віктара Кахновіча

19 мая 2017 г. (пятніца) на гiстарычным факультэце БДУ плануецца чарговае пасяджэнне ГДГ “РАДАВОД” (генеалагічныя даследаванні, гiсторыя сям’і, вывучэнне ўласнага радаводу).

У праграме пасяджэння плануецца:

1. “Радаводы беларускіх літаратараў”, дакладчык — Аўласенка Ігар Міхайлавіч, кандыдат гістарычных навук, выкладчык кафедры гісторыі новага і навейшага часу ГФ БДУ.

2. “Асаблівасці генеалагічных даследаванняў на падставе метрычных кніг праваслаўных прыходаў Пінскага павета”, дакладчык — Кахновіч Віктар Адамавіч, кандыдат гістарычных навук, дацэнт кафедры гісторыі Расіі ГФ БДУ.

 Запрашаем да ўдзелу ўсіх, хто цікавіцца генеалогіяй і ўласным радаводам!

Час і месца пасяджэння: 19 мая 2017 г. (пятніца), 17.40, БДУ, гiстарычны факультэт (вул. Чырвонаармейская, 6), ауд. № 23, другі паверх.

 Калі вы не можаце самі прысутнічаць на пасяджэнні, але падтрымліваеце нашы ініцыятывы, салідарны з намі ў нашай справе, калі ласка, размясціце абвестку на сваіх старонках у сацыяльных сетках Інтэрнэта.

Кантакты: +375293998733 (velcom), slepovron@mail.ru, http://www.facebook.com/radavod, http://vk.com/radavod, http://hist.bsu.by/kafedry/kafedra-istochnikovedeniya/nauchnye-kruzhki.html __________________________________________________________________

metrika



Пасяджэнне ГДГ Радавод на тэму “Генеалогія і генетыка”

27 лютага 2017 г. на гістарычным факультэце БДУ адбылося чарговае пасяджэнне ГДГ “Радавод”, прысвечанае значэнню генетычных дадзеных для даследавання генеалогіі.

Этнагенетык Васіль Сяргеевіч Панкратаў  распавёў пра y-храмасомнае (мужчынскае), мітахандрыяльнае  (жаночае) і аўтасомнае ДНК (агульнае), у т.л. асаблівасці іх аналізу. Выступовец падкрэсліў, што генетыка і культура народаў не залежаць адна ад другой, а геаграфічная дыстанцыя народаў уплывае на іх генетычную блізкасць.  Наяўнасць розных y-храмасом у прадстаўнікоў аднаго прозвішча сведчыць пра рознае паходжанне яго носьбітаў, супадзенне y-храмасом у незалежнасці ад супадзення або несупадзення прозвішчаў сведчыць пра агульнасць паходжання (пры гэтым агульны продак можа пражываць і тысячу год назад у дапісьмовы і дафамільны перыяд).

Даследчык генеалогіі Максім Гацак, выкарыстоўваючы пісьмовыя сведчанні  XVIII – XIX стст. аб паходжанні свайго роду з тэрыторыі Бабруйскага павета Мінскай губерні, правёў даследаванне па ўсіх трох напрамках генетычных пошукаў. Па выніках даследавання y-храмасомнага ДНК выступовец вызначыў, што сям’я Гацакоў магла быць пераселена ў Бабруйскае староства з тэрыторый сучаснай Хмяльніцкай вобласці Украіны, Валыні або Заходняй Беларусі, а таксама з рэгіёна польскага Памор’я. Далейшая праца з пісьмовымі крыніцамі і генетычнымі маркерамі можа даць больш канкрэтны адказ аб рэгіёне паходжання Гацакоў з Бабруйшчыны.

106_1851 106_1852 106_1856

27.02.2017


18126

27 лютага 2017 г. пройдзе пасяджэнне гуртка “Радавод” на тэму “ДНК-аналіз у генеалагічных даследаваннях”

27 лютага 2017 г. (панядзелак) на гiстарычным факультэце БДУ плануецца чарговае пасяджэнне ГДГ “РАДАВОД” (генеалагічныя даследаванні, гiсторыя сям’і, вывучэнне ўласнага радаводу).

Чытаць далей



Лекцыя для навучэнцаў Школы Практычнай генеалогіі ў Нацыянальным гістарычным архіве Беларусі

27 студзеня 2017 г. у Нацыянальным гістарычным архіве Беларусі адбыўся занятак для навучэнцаў Школы Практычнай генеалогіі. У першай частцы Вадзім Валер’евіч Урублеўскі распавёў пра гісторыю архіўнай справы, мінулае і сучаснасць Нацыянальнага гістарычнага архіва Беларусі, прадэманстраваў яго выданні, паказаў прыклады асноўных генеалагічных крыніц. У другой частцы Яўген Станіслававіч Глінскі, супрацоўнік аддзела публікацыі дакументаў архіва, распавёў пра вопыт даследавання радаводу сваіх продкаў – вольных людзей з маёнтка Пырашава князя Дамініка Радзівіла, а таксама падзяліўся досведам у справе выяўлення фальсіфікаваных дакументаў.

106_1782

Вадзім Урублеўскі (на пярэднім плане) і Яўген Глінскі (выступае перад слухачамі)

106_1784 106_1789



Крыніцы па генеалогіі (на прыкладзе Лідчыны): выступленне ў Лідскай раённай бібліятэцы (18.01.2017)

18 студзеня 2017 г. у Лідскай раённай бібліятэцы імя Янкі Купалы адбыўся выступ Вадзіма Урублеўскага на тэму “Крыніцы па генеалогіі (на прыкладзе Лідчыны): паводле матэрыялаў Нацыянальнага гістарычнага архіва Беларусі”.

Падчас выступлення быў акрэслены агульны парадак даследавання сваіх каранёў, адзначаны асноўныя генеалагічныя крыніцы па рэгіёне дарэвалюцыйнага перыяда, звернута ўвага на месцы іх захавання. Лекцыя суправаджалася дэманстрацыяй прэзентацыі. На мерапрыемстве прысутнічалі прадстаўнікі ўстаноў культуры і асобныя грамадскія актывісты.

Чакаем запрашэнняў з іншых раённых устаноў культуры!

18.01.2017

106_1770


09. Героспіс Глаўдзеляў (1786)
106_1772